ಬೆಂಗಳೂರು : ತಾಯಿ ಮಗಳಿಗೆ ಸಣ್ಣ ವಿಷಯಕ್ಕೆ ಹಲ್ಲೆ ಮಾಡಿದ್ದಾಳೆ. ಇದರಿಂದ ಕೋಪಗೊಂಡ ಮಗಳು 112 ಗೆ ಕರೆ ಮಾಡಿ, ಅಮ್ಮನ ವಿರುದ್ದವೇ ಮಗಳು ದೂರು ನೀಡಿದ್ದಾಳೆ.
ಬಾಲಕಿ 112 ಗೆ ಕರೆ ಮಾಡಿ, ಪೊಲೀಸ್ ಅಂಕಲ್ ನನಗೆ ಪ್ರತಿದಿನ ಅಮ್ಮ ನಾಯಿಗೆ ಬಡಿದಂಗೆ ಬಡೀತಾಳೆ. ಪ್ಲೀಸ್ ನಮ್ಮಮ್ಮನಿಗೆ ಸ್ವಲ್ಪ ಬುದ್ದಿ ಹೇಳಿ ಎಂದಿದ್ದಾಳೆ. ಪುಟ್ಟೀ ಎಲ್ಲಿಂದ ಫೋನ್ ಮಾಡ್ತಿದ್ದೀಯಮ್ಮ ಎಂದು ಪೊಲೀಸ್ ವಿಚಾರಿಸಿದ್ದಕ್ಕೆ ಲಗ್ಗೆರೆ ಅಂತಾ ಪುಟ್ಟ ಬಾಲಕಿ ಉತ್ತರ ಕೊಟ್ಟಿದ್ದಾಳೆ.
ಕೂಡಲೇ ನಂದಿನಿ ಲೇಔಟ್ ಪೊಲೀಸರಿಗೆ ಕರೆ ವರ್ಗಾವಣೆಯಾಗಿದ್ದು, ಬಳಿಕ ನಂದಿನಿ ಲೇಔಟ್ ಪೊಲೀಸರು ಬಾಲಕಿ ಜೊತೆ ಮಾತ್ನಾಡಿದ್ದಾರೆ. ಆಗ ಬಾಲಕಿಯ ಅಡ್ರಸ್ ಹೇಳುವಂತೆ ಪೊಲೀಸರು ಕೇಳಿದ್ದು, ಬಳಿಕ ಪೊಲೀಸರು ತಾಯಿ ಮೊಬೈಲ್ ನಂಬರ್ ಪಡೆದು ಕಾಲ್ ಮಾಡಿದ್ದಾರೆ.
ಫೋನ್ನಲ್ಲಿ ಪೊಲೀಸರ ಮೇಲೇ ತಾಯಿ ಗರಂ ಆಗಿದ್ದು, ನನ್ನ ಮಗಳು.. ನಾನು ಹೊಡೀತೀನಿ.. ಬಡೀತೀನಿ ನಿಮಗೇನು..? ನನ್ನ ಮಗಳಿಗೆ ನಾನು ಹೊಡೆಯೋದ್ರಲ್ಲಿ ಏನ್ ತಪ್ಪು. ಇಡಯ್ಯಾ ಫೋನ್ ಅಂತ ಬಾಲಕಿಯ ತಾಯಿ ಕಾಲ್ ಕಟ್ ಮಾಡಿದ್ದಾಳೆ. ತಾಯಿ ಪೊಲೀಸರಿಗೆ ನಿಂದಿಸಿರೋ ಆಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಮತ್ತೊಂದೆಡೆ ಫ್ರೆಂಡ್ ಕ್ರಿಕೆಟ್ ಬ್ಯಾಟಿಂಗ್ ಕೊಡ್ಲಿಲ್ಲ ಅಂತಾ ಬಾಲಕ ಪೊಲೀಸ್ಗೆ ಕರೆ ಮಾಡಿದ್ದಾನೆ. ಹೌದು.. ಪೊಲೀಸ್ನ್ನು ಕರೆಸಿ ಬಾಲಕ ಬ್ಯಾಟಿಂಗ್ ಪಡೆದುಕೊಂಡಿದ್ದಾನೆ.
ಫ್ರೆಂಡ್ಸ್ ನನ್ನನ್ನು ಆಟಕ್ಕೆ ಸೇರಿಸಿಕೊಳ್ತಿಲ್ಲ, ಸೇರಿಸಿಕೊಂಡ್ರು ಬ್ಯಾಟಿಂಗ್,ಬೌಲಿಂಗ್ ಕೊಡ್ತಿಲ್ಲ. ಬೇಗ ಪೊಲೀಸ್ ಕಳಿಸಿ ಬ್ಯಾಟಿಂಗ್ ಕೊಡಿಸಿ ಎಂದು ಬಾಲಕ ಫೋನ್ ಮಾಡಿದ್ದಾನೆ. ಬಾಲಕನ ಕರೆಗೆ ಕಂಟ್ರೋಲ್ ರೂಂ. ತಲೆಕೆಡಿಸಿಕೊಂಡಿದ್ದು, ತಕ್ಷಣ ಹೊಯ್ಸಳ ಕಳುಹಿಸಿ ಬಾಲಕನ ಕ್ರಿಕೆಟ್ ಸಮಸ್ಯೆಗೆ ಪರಿಹಾರ ಕೊಟ್ಟಿದ್ದಾರೆ.
ಇದನ್ನೂ ಓದಿ : ರಾಮಲಲ್ಲಾ ಪ್ರಾಣಪ್ರತಿಷ್ಠಾಪನೆಗೆ ಕ್ಷಣಗಣನೆ : ಅಯೋಧ್ಯೆಯಲ್ಲಿ ಬಿಗಿ ಭದ್ರತೆ..!