ಬೆಂಗಳೂರು : ಆಸ್ತಿ, ಚಿನ್ನಾಭರಣಕ್ಕಾಗಿ ಮಗಳು, ಅಳಿಯ ಸೇರಿಕೊಂಡು ಅತ್ತೆಯನ್ನ ಕೊಲೆ ಮಾಡಲು ಯತ್ನಿಸಿರುವ ಘಟನೆ ಬೆಂಗಳೂರಿನ ಆರ್ಎಂಸಿ ಯಾರ್ಡ್ ಮಾರ್ಕೆಟ್ನಲ್ಲಿ ನಡೆದಿದೆ. ಮಗಳು ಸುಮಿತ್ರಾ, ಅಳಿಯ ಮುನಿರಾಜು ಚಾಕುವಿನಿಂದ ಇರಿದು ಅತ್ತೆಯ ಕೊಲೆಗೆ ಯತ್ನಿಸಿದ್ದಾರೆ.
ಅಣ್ಣಮ್ಮ ಎಂಬ ಮಹಿಳೆ ಚಾಕು ಇರಿತಕ್ಕೊಳಗಾಗಿದ್ದು, ಮಗಳು ಸುಮಿತ್ರಾ ಹಾಗೂ ಅಳಿಯ ಮುನಿರಾಜುನನ್ನ ಅತ್ತೆ ತಮ್ಮ ಜೊತೆಯೇ ಮನೆಯಲ್ಲಿ ಸಾಕಿಕೊಂಡಿದ್ದಳು. ಅಳಿಯ ಮುನಿರಾಜು ಆರ್ಎಂಸಿ ಯಾರ್ಡ್ನಲ್ಲಿ ಕೆಲಸ ಮಾಡುತ್ತಿದ್ದ, ಸಂಬಳ ಕೊಡಿಸಿ ಅಂತಾ ಮಗಳು, ಅಳಿಯ ಅಣ್ಣಮ್ಮರನ್ನು ಕರೆದೊಯ್ದಿದ್ದರು. ಈ ವೇಳೆ ಮುನಿರಾಜು ಅಣ್ಣಮ್ಮಗೆ ಚಾಕುವಿನಿಂದ ಇರಿದಿದ್ದಾನೆ. ನಂತರ ಮನೆಯಲ್ಲಿದ್ದ 6 ಲಕ್ಷ ಹಣ, ಚಿನ್ನಾಭರಣ ದೋಚಿದ್ದ ಆರೋಪ ಕೇಳಿಬಂದಿದೆ.
ತಾಯಿ ಸತ್ತಿದ್ದಾಳೆಂದು ನಂಬಿ ಮಗಳು, ಅಳಿಯ ಧರ್ಮಸ್ಥಳ, ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನಕ್ಕೆ ತೆರಳಿದ್ದರು. ಆದರೆ ಸ್ಥಳೀಯರು ಅಣ್ಣಮ್ಮನನ್ನು ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಿದ್ದು, ವಾಪಸ್ ಬಂದಾಗ ಅಣ್ಣಮ್ಮ ಬದುಕಿರುವುದು ಬೆಳಕಿಗೆ ಬಂದಿದೆ. ಅಳಿಯ, ಮಗಳು, ಮೊಮ್ಮಕ್ಕಳ ವಿರುದ್ಧ ಅಣ್ಣಮ್ಮ ದೂರು ನೀಡಿದ್ದಾರೆ. ಇದೀಗ RMC ಯಾರ್ಡ್ ಪೊಲೀಸರು ಅಳಿಯ, ಮಗಳನ್ನು ಬಂಧಿಸಿದ್ದಾರೆ.
ಇದನ್ನೂ ಓದಿ : ಕಾರಜೋಳಗೆ “ಗೋಬ್ಯಾಕ್” ಕಂಟಕ : ಸಿಟ್ಟಿಂಗ್ ಕ್ಷೇತ್ರ ಕಳೆದುಕೊಳ್ಳುತ್ತಾ ಬಿಜೆಪಿ?
