ವಡೋದರಾ : ನಿನ್ನೆ ವಡೋದರಾ ಇಂಟರ್ನ್ಯಾಷನಲ್ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದ 2025ರ ಮಹಿಳಾ ಪ್ರೀಮಿಯರ್ ಲೀಗ್ನ 4ನೇ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಗೆದ್ದು ಬೀಗಿದೆ. ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಆರ್ಸಿಬಿ 8 ವಿಕೆಟ್ಗಳ ಭರ್ಜರಿ ಜಯ ಸಾಧಿಸಿದೆ.
ಟಾಸ್ ಸೋತರೂ ಮೊದಲು ಬ್ಯಾಟಿಂಗ್ ಮಾಡಿದ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಆರ್ಸಿಬಿಗೆ 141 ರನ್ ಗಳಿಸಿ ಸಾಧಾರಣ ಗುರಿ ನೀಡಿತ್ತು. ಡೆಲ್ಲಿ ನೀಡಿದ 142 ರನ್ಗಳ ಗುರಿ ಬೆನ್ನಟ್ಟಿದ ಆರ್ಸಿಬಿ ಇನ್ನೂ 3.4 ಬಾಲ್ ಇರುವಂತೆಯೇ ಪಂದ್ಯವನ್ನು ಗೆದ್ದು ಬೀಗಿದೆ. ಈ ಮೂಲಕ ಈ ಸೀಸನ್ನಲ್ಲಿ ಆಡಿದ ಎರಡೂ ಪಂದ್ಯಗಳಲ್ಲಿ ಏಕಪಕ್ಷೀಯ ಗೆಲುವು ಸಾಧಿಸಿದ ಹಾಲಿ ಚಾಂಪಿಯನ್ ಆರ್ಸಿಬಿ ಪಾಯಿಂಟ್ ಪಟ್ಟಿಯಲ್ಲಿ ಅಗ್ರಸ್ಥಾನವನ್ನು ಕಾಯ್ದುಕೊಳ್ಳುವಲ್ಲಿ ಯಶಸ್ವಿಯಾಗಿದೆ.
ಇನ್ನು, ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಪರ ಓಪನಿಂಗ್ ಮಾಡಿದ ಕ್ಯಾಪ್ಟನ್ ಸ್ಮೃತಿ ಮಂದಾನ ಅಬ್ಬರಿಸಿದ್ದು, ಎದುರಿಸಿದ 47 ಬಾಲ್ನಲ್ಲಿ ಭರ್ಜರಿ ಸಿಕ್ಸರ್, ಫೋರ್ಗಳ ಸಮೇತ 81 ರನ್ ಚಚ್ಚಿದರು.
ಸ್ಮೃತಿ ಮಂದಾನಗೆ ಸಾಥ್ ನೀಡಿದ ಮತ್ತೋರ್ವ ಓಪನಿಂಗ್ ಬ್ಯಾಟರ್ ಡೇನಿಯಲ್ ವೈಟ್ ಭರ್ಜರಿ ಪ್ರದರ್ಶನ ನೀಡಿ, 33 ಬಾಲ್ನಲ್ಲಿ 42 ರನ್ ಬಾರಿಸಿದರು. ಕ್ಯಾಪ್ಟನ್ ಸ್ಮೃತಿ ಬ್ಯಾಟಿಂಗ್ ಸ್ಟ್ರೈಕ್ ರೇಟ್ 170ಕ್ಕೂ ಹೆಚ್ಚು ಇದ್ದರೆ, ಡೇನಿಯಲ್ ವೈಟ್ 125ಕ್ಕೂ ಹೆಚ್ಚೇ ಇತ್ತು. ಇನ್ನು ಕೊನೆಯ ಹಂತದಲ್ಲಿ ಎಲ್ಲಿಸ್ ಪೆರ್ರಿ 7 ರನ್ ಮತ್ತು ರಿಚಾ ಘೋಷ್ 1 ಸಿಕ್ಸರ್ ಮತ್ತು 1 ಫೋರ್ನೊಂದಿಗೆ 11 ರನ್ ಕಲೆ ಹಾಕಿ ಆರ್ಸಿಬಿ ತಂಡವನ್ನು ಗೆಲುವಿನ ದಡ ಸೇರಿಸಿದರು.
