ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ‘ಟಾಕ್ಸಿಕ್’ ಸಿನಿಮಾದ ಮೊದಲ ಗ್ಲಿಂಪ್ಸ್ ರಿಲೀಸ್ ಆಗಿದೆ. ನಟ ಯಶ್ ಅವರು ಮಸ್ತ್ ಆಗಿರುವ ಲುಕ್ನಲ್ಲಿ ಕಾಣಿಸಿಕೊಂಡಿದ್ದು, ಬರ್ತ್ಡೇ ದಿನ ರಾಕಿಭಾಯ್ ಅಭಿಮಾನಿಗಳಿಗೆ ಭರ್ಜರಿ ಟ್ರೀಟ್ ಕೊಟ್ಟಿದ್ದಾರೆ. ಸಖತ್ ಆಗಿರುವ ಬಿಜಿಎಂ ಜೊತೆ ಯಶ್ ಅವರ ಮಸ್ತ್ ಲುಕ್ ರಿವೀಲ್ ಆಗಿದ್ದು, ಟಾಕ್ಸಿಕ್ ಅವತಾರದಲ್ಲಿ ಯಶ್ ಮಿರ ಮಿರ ಮಿಂಚಿದ್ದಾರೆ.
ರಾಕಿಂಗ್ ಸ್ಟಾರ್ ಇಂದು ಬರ್ತ್ಡೇ ಆಚರಿಸಿಕೊಳ್ಳುತ್ತಿದ್ದು, 39 ನೇ ವರ್ಷಕ್ಕೆ ಕಾಲಿಟ್ಟಿದ್ದಾರೆ. ಯಶ್ ಈ ಮೊದಲೇ ತಮ್ಮ ಸಿನಿಮಾದ ಅಪ್ಡೇಟ್ ಒಂದನ್ನು ಬರ್ತ್ಡೇ ದಿನವೇ ಕೊಡೋದಾಗಿ ಹೇಳಿದ್ದರು. ಅದರಂತೆಯೇ ಈಗ ಟಾಕ್ಸಿಕ್ ಸಿನಿಮಾದ ಅಪ್ಡೇಟ್ ರಿಲೀಸ್ ಮಾಡಲಾಗಿದೆ.
ಯಶ್ ಅವರನ್ನು ಈ ಒಂದು ಗ್ಲಿಂಪ್ಸ್ನಲ್ಲಿ ಸಖತ್ ಸ್ಟೈಲಿಷ್ ಆಗಿ ತೋರಿಸಲಾಗಿದೆ. ವಿಂಟೇಜ್ ಕಾರಿನಿಂದ ಬಂದು ಇಳಿಯುವ ಯಶ್, ಕ್ಲಬ್ ಒಂದಕ್ಕೆ ಎಂಟ್ರಿ ಕೊಡುತ್ತಾರೆ. ಮದ್ಯ, ಲಲನೆಯರು, ನಶೆ ತುಂಬಿರುವ ಪಾರ್ಟಿಯಲ್ಲಿ ರಾಕಿಭಾಯ್ ಎಂಟ್ರಿಯನ್ನು ಮಸ್ತ್ ಆಗಿ ತೋರಿಸಲಾಗಿದೆ.
ಬರ್ತ್ಡೇ ಪೀಕ್ ಎನ್ನುವ ಹೆಸರಿನಲ್ಲಿ ಯಶ್ ಅವರ ಈ ಒಂದು ಗ್ಲಿಂಪ್ಸ್ ಅನ್ನು ಕೆವಿಎನ್ ಪ್ರೊಡಕ್ಷನ್ಸ್ ಯೂಟ್ಯೂಬ್ ಚಾನಲ್ನಲ್ಲಿ ರಿಲೀಸ್ ಮಾಡಲಾಗಿದೆ. ಇಷ್ಟು ದಿನ ಯಾವಾಗ ‘ಟಾಕ್ಸಿಕ್’ ಅಪ್ಡೇಟ್ ಕೊಡ್ತಾರಪ್ಪ ಅಂತ ಯಶ್ ಅಭಿಮಾನಿಗಳು ಕಾದು ಕಾದು ಸುಸ್ತಾಗಿದ್ದರು. ಅದಕ್ಕೆ ತಕ್ಕಂತೆ ಇಷ್ಟೊಂದು ಸಮಯ ಕಾದರೂ ಕೂಡಾ ಯಶ್ ಅಭಿಮಾನಿಗಳಿಗೆ ನಿರಾಸೆಯಾಗಿಲ್ಲ. ನಿರೀಕ್ಷೆಗೆ ತಕ್ಕಂತೆಯೇ ಚಿತ್ರತಂಡ ಭರ್ಜರಿ ಗಿಫ್ಟ್ ನೀಡಿದ್ದಾರೆ. ಗ್ಲಿಂಪ್ಸ್ಗೆ ಮಸ್ತ್ ಆಗಿರುವ ಬಿಜಿಎಂ, ಯಶ್ ಕಾಸ್ಟ್ಯೂಮ್, ಸ್ಟೈಲ್ ಎಲ್ಲವನ್ನೂ ನೋಡುತ್ತಿದ್ದರೆ ಇದು ಸಕತ್ ಪ್ರಾಮಿಸಿಂಗ್ ಆಗಿಯೇ ಮೂಡಿ ಬಂದಿದೆ ಎನ್ನುವುದರಲ್ಲಿ ಡೌಟೇ ಇಲ್ಲ.
‘ಟಾಕ್ಸಿಕ್’ ಚಿತ್ರಕ್ಕೆ ಮಲಯಾಳಂ ನಿರ್ದೇಶಕಿ ಗೀತು ಮೋಹನ್ದಾಸ್ ನಿರ್ದೇಶನ ಮಾಡುತ್ತಿದ್ದಾರೆ. ಕೆವಿಎನ್ ಪ್ರಡಕ್ಷನ್ಸ್ ಮೂಲಕ ವೆಂಕಟ್ ನಾರಾಯಣ್ ಅವರು ಈ ಚಿತ್ರವನ್ನು ನಿರ್ಮಾಣ ಮಾಡುತ್ತಿದ್ದಾರೆ. ಈ ಸಿನಿಮಾ ಬಿಗ್ ಬಜೆಟ್ನಲ್ಲಿ ಮೂಡಿ ಬರುತ್ತಿದೆ. ಈ ಚಿತ್ರದಲ್ಲಿ ಹಿಂದಿಯ ಕಿಯಾರಾ ಅಡ್ವಾಣಿ, ತಮಿಳಿನ ನಯನತಾರಾ ನಟಿಸುತ್ತಿದ್ದಾರೆ. ಈ ಸಿನಿಮಾ ವರ್ಷಾಂತ್ಯಕ್ಕೆ ರಿಲೀಸ್ ಆಗಲಿದೆ. ಇದನ್ನು, ಪ್ಯಾನ್ ವರ್ಲ್ಡ್ ಮಟ್ಟದಲ್ಲಿ ಬಿಡುಗಡೆ ಮಾಡಲು ಆಲೋಚನೆ ನಡೆದಿದೆ. ಈ ಚಿತ್ರದಲ್ಲಿ ಹಾಲಿವುಡ್ ತಂತ್ರಜ್ಞರು ಕೂಡ ಕೆಲಸ ಮಾಡುತ್ತಿದ್ದಾರೆ.
ಇದನ್ನೂ ಓದಿ : ಬೆಳ್ಳಂಬೆಳಗ್ಗೆ ಭ್ರಷ್ಟ ಅಧಿಕಾರಿಗಳಿಗೆ ಬಿಸಿ ಮುಟ್ಟಿಸಿದ ‘ಲೋಕಾ’ – ಬೆಂಗಳೂರು, ಗದಗ ಸೇರಿ ರಾಜ್ಯದ ಹಲವೆಡೆ ದಾಳಿ!
