ಬಾಗಲಕೋಟೆ : ಅಪಘಾತದ ವೇಳೆ ಎರಡು ಟ್ರಕ್ಗಳು ಹೊತ್ತಿ ಉರಿದ ಘಟನೆ ಬೆಳಗಲ್ ಕ್ರಾಸ್ ಬಳಿಯ NH50ರಲ್ಲಿ ತಡರಾತ್ರಿ ನಡೆದಿದೆ. ಪರಿಣಾಮ ಓರ್ವ ಟ್ರಕ್ ಚಾಲಕ ಸಾವನ್ನಪ್ಪಿದ್ದಾನೆ.
ಬೆಳಗಲ್ ಕ್ರಾಸ್ ಬಳಿ ಒಂದು ಟ್ರಕ್ಗೆ ಇನ್ನೊಂದು ಟ್ರಕ್ ಹಿಂದಿನಿಂದ ಬಂದು ಡಿಕ್ಕಿ ಹೊಡೆದಿದೆ. ಎರಡೂ ಟ್ರಕ್ಗಳು ಹುನಗುಂದ ನಿಂದ ಆಲಮಟ್ಟಿ ಮಾರ್ಗದ ಕಡೆಗೆ ಹೊರಟಿದ್ದವು. ರೋಡ್ ಬ್ರೇಕರ್ ಬಂದಾಗ ಮುಂದೆ ಹೊರಟಿದ್ದ ಖಾಲಿ ಟ್ರಕ್ ನಿಧಾನವಾಗಿ ಚಲಿಸಿದೆ. ಈ ವೇಳೆ ಹಿಂದೆ ಬರ್ತಿದ್ದ ಹತ್ತಿ ಬೀಜದ ಲೋಡ್ ಹಾಕಿದ್ದ ಟ್ರಕ್ ಡಿಕ್ಕಿ ಹೊಡೆದಿದೆ.
ಡಿಕ್ಕಿ ಹೊಡೆದ ಪರಿಣಾಮ ಟ್ರಕ್ನ ಟೈಯರ್ ಬ್ಲಾಸ್ಟ್ ಆಗಿ ಬೆಂಕಿ ಕಾಣಿಸಿಕೊಂಡಿದೆ. ಹಿಂದಿನ ಟ್ರಕ್ನಲ್ಲಿ ಹತ್ತಿ ಬೀಜದ ಲೋಡ್ ಹಾಕಿದ್ದ ಕಾರಣ ಕ್ಷಣ ಮಾತ್ರದಲ್ಲೇ ಬೆಂಕಿ ಜೋರಾಗಿ ಉರಿದು ಎರಡೂ ಟ್ರಕ್ಗೆ ಹೊತ್ತಿಕೊಂಡಿದೆ. ಬೆಂಕಿಯ ಕೆನ್ನಾಲಿಗೆಗೆ ಓರ್ವ ಲಾರಿ ಚಾಲಕ ಸಾವನ್ನಪ್ಪಿದ್ದಾನೆ.
ಒಂದು ಲಾರಿ ರಾಜಸ್ಥಾನ ಮೂಲದ್ದಾಗಿದ್ದು, ಇನ್ನೊಂದು ಲಾರಿ ಮಹಾರಾಷ್ಟ್ರ ಮೂಲದೆಂಬ ಮಾಹಿತಿ ಲಭಿಸಿದೆ. ಸ್ಥಳಕ್ಕೆ ಹುನಗುಂದ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಸಾವನ್ನಪ್ಪಿದ ಮೃತ ಚಾಲಕನ ಹೆಸರು ಇನ್ನಷ್ಟೇ ಪತ್ತೆಯಾಗಬೇಕಿದೆ. ಸದ್ಯ ಪೊಲೀಸರು ಪರಿಶೀಲನೆಯಲ್ಲಿ ತೊಡಗಿದ್ದು, ತನಿಖೆಯಿಂದ ಹೆಚ್ಚಿನ ಮಾಹಿತಿ ಸಿಗಬೇಕಿದೆ. ಹುನಗುಂದ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಘಟನೆ ನಡೆದಿದೆ.
ಇದನ್ನೂ ಓದಿ : ನಾಗೇಂದ್ರ ಬೆನ್ನಲ್ಲೇ ದದ್ದಲ್ಗೂ ಅರೆಸ್ಟ್ ಸಂಕಷ್ಟ – ಸೆಷನ್ ನಡೆಯೋ ಹೊತ್ತಲ್ಲೇ ನೋಟಿಸ್ ಕೊಟ್ಟ ED..!