ಚೆನ್ನೈ : ತಮಿಳುನಾಡಿನ ಅಪಾರ್ಟ್ಮೆಂಟ್ ಒಂದರ ನಾಲ್ಕನೇ ಮಹಡಿಯಲ್ಲಿ ತಾಯಿ ಮಗುವನ್ನು ಆಟವಾಡಿಸುತ್ತಿದ್ದಾಗ ಆಯತಪ್ಪಿ 7 ತಿಂಗಳ ಮಗ ಕೆಳಕ್ಕೆ ಜಾರಿದೆ. ಅದೃಷ್ಟವಶಾತ್ ಮಗು ಕಿಟಕಿಯ ರೂಫ್ ಮೇಲೆ ಬಿದ್ದು ಜಾರುತ್ತಿದ್ದಾಗ ಸ್ಥಳೀಯರು ಹರಸಾಹಸಪಟ್ಟು ಮಗುವನ್ನು ರಕ್ಷಣೆ ಮಾಡಿದ್ದಾರೆ. ಚೆನ್ನೈಯ ತಿರುಮಲೈವೋಯಲ್ನಲ್ಲಿ ನಡೆದ ಈ ಘಟನೆಯ ದೃಶ್ಯ ಭಾರೀ ವೈರಲ್ ಆಗಿದೆ.
ತಾಯಿ ತನ್ನ ಮಗುವನ್ನು ಆಟವಾಡಿಸುತ್ತಿದ್ದಾಗ ಆಕಸ್ಮಿಕವಾಗಿ ಕೈಯಿಂದ ಜಾರಿ ಮಗು ರೂಫ್ ಮೇಲೆ ಬಿದ್ದಿದೆ. ತಕ್ಷಣ ಎಚ್ಚೆತ್ತ ತಾಯಿ ಕಿರುಚಿಕೊಂಡು ಅಪಾರ್ಟ್‌ಮೆಂಟ್ನಲ್ಲಿದ್ದ ಎಲ್ಲರನ್ನು ಸೇರಿಸಿದ್ದಾರೆ. ಕೂಡಲೇ ಜನರು ಗುಂಪು ಸೇರಿದ್ದಾರೆ. ಈ ವೇಳೆ ಮೊದಲ ಮಹಡಿಯ ಕಿಟಕಿ ಮೂಲಕ ಒಬ್ಬರು ಮಗುವನ್ನ ರಕ್ಷಣೆ ಮಾಡಲು ಮುಂದಾಗುತ್ತಾರೆ. ಆದರೆ ಆಗಲಿಲ್ಲ. ತಕ್ಷಣವೇ ಇನ್ನೊಬ್ಬ ವ್ಯಕ್ತಿ ಬಂದು ಮಗುವನ್ನ ಕೈಯಿಂದ ಹಿಡಿದು ನಿಧಾನವಾಗಿ ಮೇಲಿನಿಂದ ಕೆಳಕ್ಕೆ ಇಳಿಸಿಕೊಂಡಿದ್ದಾರೆ. ಹೀಗಾಗಿ ಮಗು ಸುರಕ್ಷಿತವಾಗಿ ತಾಯಿ ಮಡಿಲು ಸೇರಿದೆ.
ಈ ಮಗುವನ್ನು ರಕ್ಷಣೆ ಮಾಡುವಾಗ ಎಲ್ಲಿ ಕೆಳಕ್ಕೆ ಜಾರಿ ಬೀಳುತ್ತೋ ಎಂದು ನೆಲ ಮಹಡಿಯಲ್ಲಿ ಸ್ಥಳೀಯರು ದೊಡ್ಡ ದೊಡ್ಡ ಹೊದಿಕೆಗಳನ್ನು ಹಿಡಿದು ನಿಂತಿದ್ದರು. ಅಲ್ಲದೇ ಬೆಡ್ ಅನ್ನು ನೆಲಕ್ಕೆ ಹಾಕಿದ್ದರು. ಆದರೆ ಸದ್ಯ ಆ ಮಗುವನ್ನ ಕಿಟಕಿ ಮೂಲಕ ರಕ್ಷಣೆ ಮಾಡಲಾಯಿತು. ಈ ಮಗುವಿನ ರಕ್ಷಣೆಯ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್ ಆಗ್ತಿದೆ.
ಇದನ್ನೂ ಓದಿ : ಬಿಜೆಪಿ ಹಿರಿಯ ನಾಯಕ ಶ್ರೀನಿವಾಸ ಪ್ರಸಾದ್ ನಿಧನಕ್ಕೆ ಪ್ರಧಾನಿ ಮೋದಿ, ಮಾಜಿ ಪ್ರಧಾನಿ ಹೆಚ್‌ಡಿಡಿ ಸಂತಾಪ..!
