ಅಹಮದಾಬಾದ್ : ಕ್ರಿಕೆಟ್ ಪ್ರೇಮಿಗಳ ಮಹಾ ಹಬ್ಬ, ಇಂಡಿಯನ್ ಪ್ರೀಮಿಯರ್ ಲೀಗ್ನ ಮತ್ತೊಂದು ರೋಚಕ ಆವೃತ್ತಿ ತನ್ನ ಅಂತಿಮ ಘಟ್ಟಕ್ಕೆ ಬಂದು ನಿಂತಿದೆ. ಇಡೀ ದೇಶ ಕಾತರದಿಂದ ಕಾಯುತ್ತಿರುವ ಐಪಿಎಲ್ 2025ರ ಫೈನಲ್ ಪಂದ್ಯ ಇಂದು ಅಹಮದಾಬಾದ್‌ನ ಭವ್ಯ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ನಡೆಯಲಿದೆ.
ಫೈನಲ್‌ಗೆ ಲಗ್ಗೆ ಇಟ್ಟಿರುವ ರಜತ್‌ ಪಟಿದಾರ್‌ ನಾಯಕತ್ವದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮತ್ತು ಶ್ರೇಯಸ್ ಅಯ್ಯರ್ ನೇತೃತ್ವದ ಪಂಜಾಬ್ ಕಿಂಗ್ಸ್ ತಂಡಗಳು ಚಾಂಪಿಯನ್ ಪಟ್ಟಕ್ಕಾಗಿ ಭರ್ಜರಿ ಕಾದಾಟ ನಡೆಸಲಿವೆ.
ಚಾಂಪಿಯನ್ ತಂಡಕ್ಕೆ $2.4 ಮಿಲಿಯನ್ ಬಹುಮಾನ : ಫೈನಲ್ ಪಂದ್ಯಕ್ಕೆ ಕ್ಷಣಗಣನೆ ಇರುವಾಗ, ಚಾಂಪಿಯನ್ ತಂಡಕ್ಕೆ ಸಿಗುವ ಬಹುಮಾನದ ಮೊತ್ತದ ಬಗ್ಗೆ ಕುತೂಹಲ ಮೂಡಿದೆ. ಐಪಿಎಲ್ 2025ರ ವಿಜೇತ ತಂಡ ಬರೋಬ್ಬರಿ 20 ಕೋಟಿ ರೂಪಾಯಿಗಳನ್ನು (ಸುಮಾರು $2.4 ಮಿಲಿಯನ್) ಬಹುಮಾನವಾಗಿ ಗೆಲ್ಲುವ ಸಾಧ್ಯತೆಯಿದೆ. ರನ್ನರ್ ಅಪ್ ತಂಡಕ್ಕೆ ಸುಮಾರು 13 ಕೋಟಿ ರೂಪಾಯಿಗಳು (ಸುಮಾರು $1.56 ಮಿಲಿಯನ್) ಸಿಗಲಿದೆ. ಈ ಬಹುಮಾನದ ಮೊತ್ತದಲ್ಲಿ ಯಾವುದೇ ಬದಲಾವಣೆಗಳನ್ನು ಘೋಷಿಸಿಲ್ಲ ಮತ್ತು 2022ರಿಂದಲೂ ಇದೇ ಮೊತ್ತವನ್ನು ಮುಂದುವರೆಸಿಕೊಂಡು ಬರಲಾಗುತ್ತಿದೆ.
ವೈಯಕ್ತಿಕ ಪ್ರಶಸ್ತಿಗಳಿಗೂ ಬಂಪರ್ ಬಹುಮಾನ : ತಂಡಗಳ ಜೊತೆಗೆ, ವೈಯಕ್ತಿಕ ಪ್ರಶಸ್ತಿಗಳಿಗೂ ಭಾರೀ ಬಹುಮಾನಗಳಿವೆ. ಆರೆಂಜ್ ಕ್ಯಾಪ್ (ಅತ್ಯಧಿಕ ರನ್ ಗಳಿಸಿದವರು) ಮತ್ತು ಪರ್ಪಲ್ ಕ್ಯಾಪ್ (ಅತ್ಯಧಿಕ ವಿಕೆಟ್ ಪಡೆದವರು) ವಿಜೇತರಿಗೆ ಕ್ಯಾಪ್ ಜೊತೆಗೆ ತಲಾ 10 ಲಕ್ಷ ರೂಪಾಯಿಗಳ ಬಹುಮಾನ ದೊರೆಯಲಿದೆ. ಇದರ ಜೊತೆಗೆ, ಋತುವಿನ ಅತ್ಯುತ್ತಮ ಕ್ಯಾಚ್‌ಗೆ (ಕ್ಯಾಚ್ ಆಫ್ ದಿ ಸೀಸನ್) ಸಹ ಪ್ರಶಸ್ತಿ ನೀಡಲಾಗುತ್ತದೆ ಮತ್ತು ವಿಜೇತರಿಗೆ 10 ಲಕ್ಷ ರೂಪಾಯಿಗಳು ಸಿಗಲಿವೆ. ಸದ್ಯ ಮಹಾ ಫೈನಲ್‌ಗೆ ಕೌಂಟ್ಡೌನ್ ಶುರುವಾಗಿದ್ದು, ಯಾವ ತಂಡ ಚಾಂಪಿಯನ್ ಆಗಿ ಹೊರಹೊಮ್ಮಲಿದೆ ಎಂಬುದನ್ನು ಕಾದು ನೋಡಬೇಕು.
ಇದನ್ನೂ ಓದಿ : ಕಮಲ್ ಹಾಸನ್ ‘ಥಗ್‌ ಲೈಫ್‌’ ಸಿನಿಮಾಗೆ ಬ್ಯಾನ್‌ ಬಿಸಿ – ಹೈಕೋರ್ಟ್ನಲ್ಲಿ ಇಂದು ಅರ್ಜಿ ವಿಚಾರಣೆ!
