ನವದೆಹಲಿ : ಕೆರಿಬಿಯನ್ ದ್ವೀಪ ಗ್ವಾಡೆಲೋಪ್ನ ಫ್ರೆಂಚ್ ಮಹಿಳೆಯಲ್ಲಿ ವಿಜ್ಞಾನಿಗಳು ‘ಗ್ವಾಡಾ ನೆಗೆಟಿವ್’ ಎಂಬ ಹೊಸ ರಕ್ತದ ಗುಂಪನ್ನು ಕಂಡುಹಿಡಿದಿದ್ದಾರೆ. ಅಸಲಿಗೆ ಪ್ರಪಂಚದಲ್ಲಿ ಒಟ್ಟು 47 ಪ್ರಕಾರದ ರಕ್ತದ ಗುಂಪುಗಳಿವೆ. ಇದಕ್ಕೀಗ ಇನ್ನೊಂದು ವಿಧದ ರಕ್ತದ ಗುಂಪು ಸೇರ್ಪಡೆಯಾಗಿದ್ದು, ಇದು ಭೂಮಿಯಲ್ಲಿ ಏಕೈಕ ವ್ಯಕ್ತಿಯ ದೇಹದಲ್ಲಿದೆ ಎಂಬುದು ವಿಶೇಷ. ಅದಕ್ಕೆ ‘ಗ್ವಾಡಾ ನೆಗೆಟಿವ್’ ಎಂಬ ಹೆಸರನ್ನೂ ಇಡಲಾಗಿದೆ.
ಹೌದು.. ಇಂಟರ್ನ್ಯಾಷನಲ್ ಸೊಸೈಟಿ ಆಫ್ ಬ್ಲಡ್ ಟ್ರಾನ್ಸ್ಫ್ಯೂಷನ್ (ಐಎಸ್ಬಿಟಿ) ಈ ವಿಶಿಷ್ಟ ರಕ್ತದ ಪ್ರಕಾರವನ್ನು ವಿಶ್ವದ 48ನೇ ರಕ್ತದ ಗುಂಪು ವ್ಯವಸ್ಥೆ ಎಂದು ಅಧಿಕೃತವಾಗಿ ಗುರುತಿಸಿದೆ. ಸುಧಾರಿತ ಡಿಎನ್ಎ ಅನುಕ್ರಮ ತಂತ್ರಗಳನ್ನು ಬಳಸಿಕೊಂಡು ಸಂಶೋಧಕರು ಅಪರೂಪದ ಆನುವಂಶಿಕ ರೂಪಾಂತರವನ್ನು ಗುರುತಿಸಿದ ನಂತರ ಈ ಆವಿಷ್ಕಾರ ಬಂದಿದೆ.
ಮಹಿಳೆ ಪ್ರಸ್ತುತ ಈ ರಕ್ತ ಪ್ರಕಾರದ ಏಕೈಕ ವಾಹಕವಾಗಿದ್ದು, ಅವಳು ತನ್ನೊಂದಿಗೆ ಮಾತ್ರ ಈ ರಕ್ತಗುಂಪನ್ನು ಹೊಂದಿದ್ದಾಳೆ. ವರದಿಯ ಪ್ರಕಾರ, 2011ರಲ್ಲಿ ಪ್ಯಾರಿಸ್ನಲ್ಲಿ ವಾಸಿಸುತ್ತಿದ್ದ 54 ವರ್ಷದ ಮಹಿಳೆ ಶಸ್ತ್ರಚಿಕಿತ್ಸೆಗೆ ಮುಂಚೆ ರಕ್ತ ಪರೀಕ್ಷೆಗಳಿಗೆ ಒಳಗಾಗಿದ್ದರು. ಪರೀಕ್ಷೆಗಳ ಸಮಯದಲ್ಲಿ, ಸಂಶೋಧಕರು ಯಾವುದೇ ತಿಳಿದಿರುವ ರಕ್ತದ ಗುಂಪಿಗೆ ಹೊಂದಿಕೆಯಾಗದ ಅತ್ಯಂತ ಅಸಾಮಾನ್ಯ ಪ್ರತಿಕಾಯವನ್ನು ಪತ್ತೆ ಮಾಡಿದ್ದರು. ಆದಾಗ್ಯೂ, ಆ ಸಮಯದಲ್ಲಿ ಸೀಮಿತ ಸಂಪನ್ಮೂಲಗಳು ಆಳವಾದ ವಿಶ್ಲೇಷಣೆಯನ್ನು ತಡೆಗಟ್ಟಿದವು.
ಫ್ರೆಂಚ್ ಬ್ಲಡ್ ಎಸ್ಟಾಬ್ಲಿಷ್ಮೆಂಟ್ (ಇಎಫ್ಎಸ್) ವಿಜ್ಞಾನಿಗಳು 2019ರವರೆಗೆ ಹೆಚ್ಚಿನ-ಥ್ರೂಪುಟ್ ಡಿಎನ್ಎ ಅನುಕ್ರಮವನ್ನು ನಡೆಸಲು ಸಾಧ್ಯವಾಗಲಿಲ್ಲ. ಇದು ಹೊಸ ರಕ್ತದ ಪ್ರಕಾರಕ್ಕೆ ಕಾರಣವಾದ ಆನುವಂಶಿಕ ರೂಪಾಂತರವನ್ನು ಬಹಿರಂಗಪಡಿಸಿತು. ಇದೀಗ ಈ ಹೊಸ ರಕ್ತದ ಗುಂಪಿಗೆ ಮಹಿಳೆಯ ಊರಾದ ‘ಗ್ವಾಡಾ’ ಎಂದೇ ವಿಜ್ಞಾನಿಗಳು ಹೆಸರಿಟ್ಟಿದ್ದಾರೆ. ಈ ಬೆಳವಣಿಗೆಯಿಂದಾಗಿ, ಮುಂದೆ ಯಾರಲ್ಲಾದರೂ ಈ ರಕ್ತದ ಮಾದರಿ ಪತ್ತೆಯಾದಲ್ಲಿ, ಚಿಕಿತ್ಸೆ ನೀಡುವುದು ಸುಲಭವಾಗಿದೆ.
ಇದನ್ನೂ ಓದಿ : ಇಲ್ಲಿಂದ ಭೂಮಿಯನ್ನು ನೋಡುವುದೇ ಸೌಭಾಗ್ಯ, ಈ 14 ದಿನ ಅದ್ಭುತವಾಗಿರಲಿದೆ – ISSನಿಂದ ಶುಭಾಂಶು ಶುಕ್ಲಾ ಮೊದಲ ಸಂದೇಶ!
