ಬೆಂಗಳೂರು : ನಗರದ ಜನಸಂದಣಿ ಪ್ರದೇಶಗಳು, ಮುಖ್ಯವಾಗಿ ಬಸ್ಗಳನ್ನು ಟಾರ್ಗೆಟ್ ಮಾಡಿ ಮೊಬೈಲ್ ಕಳ್ಳತನ ಮಾಡುತ್ತಿದ್ದ ಖತರ್ನಾಕ್ ಗ್ಯಾಂಗ್ನ 6 ಮಂದಿಯನ್ನು ಸಿಸಿಬಿ ಪೊಲೀಸರು ಬಂಧಿಸಿದ್ದಾರೆ. ಕಳ್ಳರು ಬಳಸುತ್ತಿದ್ದ ಹೈಟೆಕ್ ತಂತ್ರಕ್ಕೆ ಪೊಲೀಸರೇ ಅಚ್ಚರಿಗೊಂಡಿದ್ದು, ಬಂಧಿತರಿಂದ ಬರೋಬ್ಬರಿ 450 ಮೊಬೈಲ್ ಫೋನ್ಗಳನ್ನು ವಶಪಡಿಸಿಕೊಳ್ಳಲಾಗಿದೆ.
ಬಸ್ಗಳಲ್ಲಿ ಮೊಬೈಲ್ ಕದ್ದು, ಬಳಿಕ ಫೋನ್ ಸ್ವಿಚ್ ಆಫ್ ಮಾಡದೇ ಸಿಮ್ ನೆಟ್ವರ್ಕ್ ಕಡಿತಗೊಳಿಸಲು ಈ ಖತರ್ನಾಕ್ ಕಳ್ಳರು ವಿಶಿಷ್ಟ ವಿಧಾನ ಅನುಸರಿಸುತ್ತಿದ್ದರು. ಸಾಮಾನ್ಯವಾಗಿ ಫುಡ್ ಪಾರ್ಸಲ್ ಮಾಡಲು ಬಳಸುವ ಅಲ್ಯೂಮಿನಿಯಂ ಫಾಯಿಲ್ ಬಳಸಿ ಅದರಲ್ಲಿ ಕದ್ದ ಮೊಬೈಲ್ ಸುತ್ತಿಡುತ್ತಿದ್ದರು.
ಫಾಯಿಲ್ನಲ್ಲಿ ಮೊಬೈಲ್ ಸುತ್ತುವುದರಿಂದ ನೆಟ್ವರ್ಕ್ ಸಿಗುವುದಿಲ್ಲ. ಯಾರಾದರೂ ಕದ್ದ ಮೊಬೈಲ್ಗೆ ರಿಂಗ್ ಮಾಡಿದರೂ ಅದು ‘ನಾಟ್ ರೀಚೇಬಲ್’ ಎಂದು ಬರುತ್ತಿತ್ತು. ಫೋನ್ ಸ್ವಿಚ್ ಆಫ್ ಆಗದ ಕಾರಣ ಜಿಪಿಎಸ್ ಟ್ರ್ಯಾಕ್ ಆಗುವ ಸಾಧ್ಯತೆ ಕಡಿಮೆಯಾಗುತ್ತಿತ್ತು. ಇದರಿಂದ ಪೊಲೀಸರ ಅಥವಾ ಮಾಲೀಕರ ಟ್ರ್ಯಾಕಿಂಗ್ ಪ್ರಯತ್ನ ವಿಫಲಗೊಳಿಸಿ, ಮೊಬೈಲ್ ಮಾರಾಟ ಮಾಡುವುದು ಈ ಗ್ಯಾಂಗ್ನ ತಂತ್ರವಾಗಿತ್ತು.
ನಗರದ ಬಸ್ ನಿಲ್ದಾಣಗಳು, ಬಿಎಂಟಿಸಿ ಬಸ್ಗಳನ್ನೇ ಪ್ರಮುಖವಾಗಿ ಟಾರ್ಗೆಟ್ ಮಾಡುತ್ತಿದ್ದ ಈ ಗ್ಯಾಂಗ್, ಜನರು ಕಿಕ್ಕಿರಿದಿರುವ ಸಮಯದಲ್ಲಿ ಕಳ್ಳತನ ನಡೆಸುತ್ತಿದ್ದರು. ಇದೀಗ ಅರ್ಬಾಜ್, ಚಂದ್ರಶೇಖರ್, ಅಫ್ರೋಜ್, ಮದನ್, ಶಾಂತಕುಮಾರ್ ಮತ್ತು ಮೊಹಮ್ಮದ್ ಯಾಸಿನ್ ಸೇರಿ ಒಟ್ಟು 6 ಮಂದಿಯನ್ನು ಸಿಸಿಬಿ ಪೊಲೀಸರು ಬಂಧಿಸಿದ್ದಾರೆ. ಬಂಧಿತ ಆರೋಪಿಗಳಿಂದ ವಿವಿಧ ಕಂಪನಿಗಳ 450 ಮೊಬೈಲ್ ಫೋನ್ಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಘಟನೆ ಸಂಬಂಧ ಸಿಟಿ ಮಾರ್ಕೆಟ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಇದನ್ನೂ ಓದಿ : ನಟ ದರ್ಶನ್ಗೆ ಮತ್ತೆ ಬಿಗ್ ಶಾಕ್ – ಹೆಚ್ಚುವರಿ ಹಾಸಿಗೆ, ದಿಂಬು ನೀಡಲು ನಿರಾಕರಿಸಿ ಕೋರ್ಟ್ ಆದೇಶ!
